У Мінску каля будынку былога кляштару бэрнардынцаў сабралася каля сотні чалавек.

Адбылася супольная малітва за тое, каб каталіцкім вернікам вярнулі касцёл святога Язэпа, каб быў адменены закон аб рэлігіях і каб вернікі ўсіх канфэсіяў Беларусі мелі роўныя правы.

Супрацоўнікі міліцыі і спэцназаўцы назіралі за акцыяй на адлегласці некалькіх мэтраў. У дварах стаяць аўтазакі, а таксама міліцэйскія машыны. Але сама акцыя прайшла без затрыманняў.

Больш за пятнаццаць гадоў каталікі Мінску дамагаюцца вяртання адабранага яшчэ ў 1863 г. кляштара з касцёлам Сьвятога Язэпа. Тым не менш, згодна з плянамі засваеньня гарадзкой тэрыторыі, архітэктурны ансамбль ХVII стагодзьдзя менскія ўлады зьбіраюцца перарабіць на гатэль. Праект прадугледжвае поўную рэканструкцыю ўнікальнага архітэктурнага помніку пад гатэльны комплекс, які будзе змяшчаць рэстараны, падземны паркінг, басейн і іншыя забаўляльныя ўстановы.

Ані пра якае культурна-асьветнае прызначэньне ўнікальных помнікаў, ані пра іх вяртаньне законным уласьнікам — каталіцкай царкве — гаворка не вядзецца.