Беларускія дэмакраты ўшанавалі 3 ліпеня памяць беларусаў, якія загінулі падчас Вялікай Айчыннай вайны. Міжнародны каардынатар Хартыі’97 Андрэй Саннікаў, міністр знешнеэканамічных сувязяў Беларусі (1994–1999 гг) Міхаіл Марыніч і каардынатар Еўрапейскай Кааліцыі Мікола Статкевіч усклалі кветкі да Вечнага агню на плошчы Перамогі ў Менску. Разам с лідэрамі апазіцыі 150 моладзевых актывістаў у кашулях "За свабоду!" прынеслі да помніка Перамогі кошык кветак з бел-чырвона-белай стужкай з словамі "За свабоду! За Беларусь!".

"Мы прыйшлі аддаць даніну тым, хто загінуў за Беларусь, за жыццё цяперашніх пакаленняў. Менск быў першай еўрапейскай сталіцай, якая была вызваленая ад фашысцкіх захопнікаў. У Аб`яднанай Еўропе, паўнапраўным сябрам якой, безумоўна, стане Беларусь, гэтае свята таксама будзе адзначацца. Гэты дзень заўсёды быў у пашане не толькі ў Менску, але і ў Беларусі, таму што вызваленне сталіцы – гэта і вызваленне цэлай краіны. Гісторыя потым распарадзілася па-іншаму, але, тым не менш, забываць пра тое, што вызвалялі родную зямлю і вызвалялі ад акупантаў ніколі не варта", – заявіў міжнародны каардынатар Хартыі’97, экс-намеснік міністра замежных спраў Беларусі Андрэй Саннікаў.

"У мінулым стагоддзі ў Беларусі было дзве трагедыі і дзве бяды: гэта бальшавізм і фашызм. Мая сям`я панесла страты ад абедзвюх трагедый. Адзін мой дзед, Сямён Гарбавец, удзельнік беларускага падполля ў Польшчы, старшыня сельсавета, быў забіты падчас допыту ў НКВД у 1937 годзе. Другі дзед, Павал Статкевіч, хворы і немалады чалавек, быў забіты ў сваёй хаце паліцаямі за сувязь з партызанамі. І сёння я хачу ўшанаваць памяць маіх родных, якія пацярпелі ад фашызму, і усіх беларусаў, якія загінулі падчас гэтай вайны”, – заявіў каардынатар Еўрапейскай Кааліцыі, старшыня Беларускай сацыял-дэмакратычнай партыі (Народная Грамада) Мікола Статкевіч.

"Вызваленне Менска – гэта вялікае свята ўсяго беларускага народа. Гэта даніна памяці тым людзям, якія абаранялі Беларусь ад страты суверэнітэту. На жаль, гэты суверэнітэт сёння знаходзіцца пад пагрозай з прычыны недальнабачнай палітыкі ўлад, але ўдзел моладзі ў нашай сённяшняй акцыі памяці гаворыць пра тое, што еўрапейскі рух набірае сілу ў Беларусі і падтрымліваецца грамадствам. Перамога будзе за дэмакратыяй", – перакананы адзін з лідэраў беларускай апазіцыі, міністр знешнеэканамічных сувязяў Беларусі (1994–1999 гг) Міхаіл Марыніч.

Пасля маладыя людзі да вечара гулялі па гораду з разгорнутымі сцягамі і святкавалі Дзень вызвалення Мінска ад фашысцкіх захопнікаў.