На вуліцах Мінску ды іншых гарадоў цяпер часта можна ўбачыць налепкі з заклікам прыйсці на Еўрапейскі марш. Арганізатары таксама рыхтуюць да 14 кастрычніка і лістападаўскага Сацыяльнага маршу шэраг папярэдніх вулічных мерапрыемстваў.

Актывіст моладзевай кампаніі “Джынс за свабоду” Яўген Афнагель гаворыць, што да 14 кастрычніка ў Мінску яшчэ пройдуць вулічныя міні-акцыі:

“Наша мэта зрабіць так, каб на Еўрапейскі марш выйшла максімальная колькасць людзей. Бо еўрапейскія каштоўнасці цяпер вельмі актуальныя – і для моладзі, і для людзей больш сталага веку.

Маладому чалавеку вельмі важна, што сёння ён можа патрапіць у Эўропу, толькі набыўшы шэнгенскую візу за 60 эўра. А гэта ня ўсім па кішэні.

Больш сталым людзям істотна тое, што Еўрасаюз можа дапамагчы ўратаванню нашай эканомікі. Гэта тэма для ўсіх важная. Мы ведаем, што большасць насельніцтва Беларусі падтрымлівае ідэю далучэння да Еўрасаюзу. Таму нам трэба прадэманстраваць волю да ўступлення Беларусі ў Еўрасаюз. Каб улады гэта ўбачылі і, магчыма, падтрымалі”.

Паводле "Радыё Свабода"