Лідэры маладзёжных рухаў і арганізацый заявілі аб актыўным удзеле ў грамадзянскай кампаніі "Еўрапейская Беларусь". Гэта адбылося падчас прэс-канферэнцыі, якая прайшла ў Мінску сёння. У ёй удзельнічалі Яўген Афнагель (Jeans за свабоду!), Антон Каліноўскі (Моладзь БНФ), Уладзімер Лемеш (грамадзянская кампанія "За свабоду") і Артур Фінькевіч (Малады Фронт).
Маладыя людзі распавялі пра перавагі, якія дае Беларусі ўваходжанне ў Еўрапейскі Саюз. Так, Уладзімер Лемеш звярнуў увагу на тое, што адной з першых задач павінна стаць адмена шэнгенскіх візаў для жыхароў нашай краіны. Антон Каліноўскі распавёў пра эканамічныя перавагі еўрапейскага выбару Беларусі. Ён адзначыў, што еўрапейскія інвестыцыі будуць садзейнічаць рэфармаванню нашай эканомікі і выхаду з крызісу.
Артур Фінькевіч распавёў якія мерапрыемствы будуць ладзіцца ў межах кампаніі. "Мы правядзем масавыя акцыі, пікеты пад лозунгам «Беларусь у Еўропу!», будзем распаўсюджваць інфармацыйныя матэрыялы, улёткі і распавядаць беларусам пра выгоды збліжэння з Еўрасаюзам», – заявіў лідэр «Маладога Фронту»
Яўген Афнагель заклікаў падтрымаць "Еўрапейскую Беларусь" не толькі актывістаў апазіцыі, але ўсіх, каму неабыякавы лёс краіны. "На працягу апошняга году многія расійскія і, нажаль, некаторыя беларускія палітыкі казалі пра тое, што Беларусь павінна ўвайсці ў склад Расіі. Падобныя размовы працягваюцца і зараз. Ужо прагучалі заявы аб тым, што ўжо ў гэтым годзе можа адбыцца рэферэндум па канстытуцыйным акце так званай саюзнай дзяржавы. У такой сітуацыі толькі ўваходжанне ў Еўрапейскі Саюз гарантуе захаванне незалежнасці Беларусі. Гэта павінен разумець кожны патрыёт, кожны, каму неабыякавы лёс нашай радзімы", - заявіў Яўген.
Ён таксама адзначыў, што ў мінулым годзе незалежнасць упершыню стала агульнай каштоўнасцю і для ўладаў і для апазіцыі і ў якасці прыкладаў прывёў акцыю "За незалежную Беларусь!" і сумеснае святкаванне 3 ліпеня.
Маладзёжныя лідэры паставілі сабе задачу разам з усімі дэмакратычнымі актывістамі сабраць 1.000.000 подпісаў грамадзян Беларусі за ўваходжанне ў Еўрапейскі Саюз.
