Міжнародная праваабарончая арганізацыя “Amnesty International” выступіла з адмысловай заявай з нагоды падзеяў 25 сакавіка ў Менску.

“Amnesty International” асудзіла, як сказана ў заяве, “празмернае прымяненне сілы” ў дачыненні да ўдзельнікаў мірнай маніфэстацыі 25 сакавіка 2008 году ў гонар 90-х угодкаў абвяшчэньня Беларускай Народнай Рэспублікі. Паводле сведкаў падзеяў – праваабаронцаў і журналістаў – паліцыянты збівалі людзей дубінкамі і нагамі, былі арыштаваныя больш як 100 чалавек, 76 чалавек былі асуджаныя. Быў збіты і затрыманы журналіст газеты “Наша Ніва” Андрэй Лянкевіч, збітыя два літоўскія тэлевізійныя журналісты.

“Amnesty International” патрабуе неадкладна вызваліць усіх, хто быў пазбаўлены волі за мірнае выяўленне сваіх поглядаў.

“Amnesty International” заклікала ўлады Беларусі выконваць свае абавязкі ў межах міжнароднага права, у тым ліку ў адпаведнасці з артыкуламі 19, 21 і 22 Міжнароднага пакту аб грамадзянскіх і палітычных правах, які гарантуе права на свабоду выяўлення меркаванняў, сходаў і аб’яднанняў. “Amnesty International” заклікае афіцыйны Мінск неадкладна спыніць перашкоды, ціск і запалохванні ў дачыненні да актывістаў грамадзянскай супольнасці, якія займаюцца абаронай правоў чалавека.

svaboda.org