Еўрапейская супольнасць ужо выступіла з рэзкім асуджэннем дзеянняў беларускіх уладаў 25 сакавіка падчас разгону прымеркавнай да 90-х угодкаў БНР вулічнай акцыі дэмакратычных сілаў са збіццём і затрыманнямі мірных дэманстрантаў і 27-28 сакавіка, калі па ўсёй краіне прайшлі акцыі запалохвання незалежных журналістаў.

Ці ўвядзе Еўрапейскі саюз новыя санкцыі ў дачыненні да кіраўніцтва Беларусі? На гэтае пытанне адказваюць эксперты “Заўтра тваёй краіны”.

Першы намеснік старшыні Партыі БНФ Вінцук Вячорка нагадвае, што санкцыі супраць Беларусі ўжо ўведзеныя з боку Злучаных Штатаў Амерыкі, і цяпер усё будзе залежаць ад скардынаванасці пазіцыі Еўрасаюза з пазіцыяй ЗША.

- Усе апошнія падзеі ў Беларусі былі “халодным душам” для тых у Брусэлі, хто ўжо прапаноўваў пачынаць шырокамаштабную супрацу з Аляксандрам Лукашэнкам, і, ва ўсякім разе, гэтая пазіцыя ўжо адыходзіць на другі план, - адзначае палітык. – Не сумняваюся, што зноў паўстане пытанне персанальных палітыка-эканамічных санкцыяў і, магчыма, агульных санкцыяў з боку Еўропы, аналагічных амерыканскім.

На думку Вінцука Вячоркі, гэта, у першую чаргу, могуць быць візавыя і рахункавыя санкцыі супраць непасрэдна адказных за загады і выкананні рэпрэсіяў.

- Але гэта могуць быць і санкцыі, якія будуць удараць па эканамічных інтарэсах непасрэдна групоўкі Лукашэнкі, - лічыць палітык.

- Ад Еўрасаюза можна чакаць падтрымкі ў нейкай ступені санкцыяў з боку Злучаных Штатаў, - мяркуе галоўны рэдактар недзяржаўнай газеты “Новы час” Аляксей Кароль. – Для беларускіх уладаў гэта будзе азначаць пагаршэнне эканамічнага стану.

- Гледзячы па апошніх падзеях, такія санкцыі будуць уведзеныя на 90 адсоткаў, - выказвае меркаванне праваабаронца Алег Волчак. – Паколькі даўно ўжо не было такога прэсінгу, як 25-га сакавіка, калі збівалі людзей, а таксама такога ўціску на незалежныя сродкі масавай іцнфармацыі, якія адныя падаюць альтэрнатыўную інфармацыю пра падзеі ў Беларусі. Тым больш, што ўжо былі зробленыя заявы з боку Еўрасаюза. Увядзенне санкцыяў цалкам рэальнае.

charter97.org