Сёння жыхарам Берасця нагадалі пра падзеі, якія адбыліся некалькі месяцаў тамуна шашы пад Мінскам. Актывісты кампаніі выйшлі на перакрыжаванне праспэкту Машэрава і вуліцы Савецкай і разгарнулі транспарант “Живой щит: ГАИ оправдали, потерпевших обвинили”. Пратэст юнакоў выклікала адмова пракуратуры распачынаць крымінальную справу ў адносінах да супрацоўнікаў ДАІ, якія летась у кастрычніку, каб спыніць п’янага кіроўцу, перакрылі дарогу з дапамогай аўтамабіляў, у якіх знаходзіліся кіроўцы разам з пасажырамі. Тады некалькі чалавек атрымалі цяжкія пашкоджанні. Пракуратура правяла праверку, з якой вынікае, што кіроўцы самі ўтварылі затор на дарозе.

Маладыя людзі прастаялі з транспарантам болей за 20 хвілінаў, за гэты час транспарант змаглі ўбачыць сотні пешаходаў і кіроўцы аўтамабіляў, пасля чаго да юнакоў падышоў пешы патруль міліцыі, які затрымаў двух актывістаў, але з-за адсутнасці доказаў, бо транспарант змаглі схаваць, іх хутка вызвалілі без складання пратаколаў.

Праз некалькі гадзін расцяжка зьявілася ў іншым месцы гораду. Яе вывесілі на чыгуначным масту за заводам “Гефест” каля 21 гадзіны, дзеля прыцягнення ўвагі кіроўцаў. У гэты час там назіраецца вялікі рух аўтатранспарту.