Дзесяткі надпісаў з заклікам да байкоту надыходзячых парламенцкіх выбараў з'явіліся на працягу апошніх двух дзён у Берасці. Маладзёжныя актывісты зрабілі іх уздоўж найбольш ажыўленых вуліц горада - Партызанскага праспекту і праспекту Рэспублікі.

"Берасцейская моладзь удзельнічае ў кампаніі байкоту выбараў ужо некалькі месяцаў, - распавядае адзін з актывістаў кампаніі, Яўген, - я ўпэўнены, што сёння гэта адзіна правільная стратэгія. Лукашэнку вельмі неабходнае прызнанне Захаду, бо ён разумее, што ад Расіі што-небудзь атрымаць будзе складана. Шкада, што нават некаторыя апазіцыйныя партыі сваім удзелам у фальшывых выбарах падтрымліваюць дыктатара. Гэта здрадніцкая пазіцыя, і моладзь гэта разумее.

Апазіцыя мае траціну кандыдатаў у дэпутаты, пры гэтым яе прадстаўніцтва ў учатковых выбаркамах - менш за 0,1%. Маладзёжных актывістаў па-ранейшаму хапаюць на кватэрах і на вуліцах, штрафуюць і кідаюць за краты. Пра якія выбары можна казаць у такіх умовах?

У Берасці акцыі, скіраваныя на байкот выбараў, зараз праходзяць амаль кожны дзень. Гэта не толькі графіці, але і распаўсюд інфармацыі, налепак, улётак. Чым бліжэй дата выбараў, тым больш актыўнай будзе наша дзейнасць!" - заявіў маладзёжны актывіст.