У Брэсце ўвечары 25 жніўня былі затрыманы два актывісты кампаніі, якія распаўсюджвалі ўлёткі аб байкоце парламенцкіх выбараў.

Як паведаміў БелаПАН праваабаронца Раман Кісляк, інцыдэнт адбыўся на вуліцы Савецкай, непадалёк ад кінатэатра "Беларусь", дзе сямёра маладых актывістаў апазіцыі раздавалі прахожым улёткі. На некаторых з удзельнікаў акцыі былі майкі з падпісам "Байкот".

Паводле слоў праваабаронцы, прыкладна ў 19.30, калі маладыя людзі раздалі ўсе ўлёткі і ўжо разыходзіліся, да двух з іх — Івана Стасюка і Яўгена Скрабца — падышлі супрацоўнікі міліцыі і прапанавалі праехаць у аддзел унутраных спраў.

На працягу амаль гадзіны міліцыянеры вялі перамовы з маладымі людзьмі, якія катэгарычна адмаўляліся ехаць у аддзяленне. Яўген Скрабец быў адпушчаны пасля таго, як прад'явіў свой пашпарт. У Івана Стасюка не было пры сабе дакументаў і яго ў 20.30 даставілі ў Ленінскае РАУС. Актывіста адпусцілі ў 20.40 пасля высвятлення асобы.