Улёткі з заклікам прыйсці на акцыю салідарнасці, якая пройдзе сёння, 8 лютага ў 18.00, на Кастрычніцкай плошчы Мінска, распаўсюдзілі актывісты кампаніі ў вагонах цягнікоў метро. Пікет пройдзе ў гадавіну арышту Мікалая Аўтуховіча і Уладзіміра Асіпенкі.

Нагадаем, што выйсці сёння на Кастрычніцкую плошчу заклікалі ўдзельнікі акцыі салідарнасці 16 студзеня.









8 лютага 2009 года ў Ваўкавыску былі арыштаваныя Мікалай Аўтуховіч, Юры Лявонаў і Уладзімір Асіпенка. Для арышту прадпрымальнікаў у Ваўкавыск з Менска прыбыў атрад спецпадраздзялення «Алмаз». Затрыманым было прад'яўленае абвінавачванне па арт. 218 Крымінальнага кодэкса (наўмыснае знішчэнне альбо пашкоджанне маёмасці). 23 чэрвеня 2009 года ў дачыненні да Аўтуховіча і, як паведаміла МУС, «іншых асобаў» узбуджаная справа па арт. 359 КК (тэрарыстычны акт) у выглядзе падрыхтоўкі (арт. 13). Іх абвіначваюць у падрыхтоўцы замаху на жыццё вышэйшых службовых асобаў вобласці.

Праваабаронцы лічаць затрыманых палітычнымі вязнямі, звяртаючы ўвагу на тое, што Аўтуховіч і Лявонаў раней ужо былі асуджаныя і прызнаныя міжнароднай супольнасцю вязнямі сумлення. У студзені 2010 года ўплывовая міжнародная праваабарончая арганізацыя «Human Rights Watch» прызнала ваўкавыскіх прадпрымальнікаў і арыштаванага ўдзельніка «Працэсу 14-ці» Арцёма Дубскага палітвязнямі.